Embroidery

اِہ کشیدہ جہڑا تھانوں اِیتھے نظر آوے گا پٹھانی کشیدہ کہلاندا ہے، ایس دا تعلق جالندھر دے نیڑے بَسدیاں باراں بستیاں نال ہے جس وچ پاکستاں بَنن توں پہلاں وزیرستان کانی گُرم توں آئے پٹھان قبائل ( مثلاً بابا خیل ، دانشمنداں، شیخ درویش، غُذاں وغیرہ ) بَسدے سن، تے جالندھر وچ بَسن دے سبب اُوہناں دی زبان وی پشتو دی تھاں آہستہ آہستہ پنجابی ہو گئی، اج کل اِہ پٹھان زیادہ تر لاہور تے فیصل آباد وچ بَسدے ہن۔ ایس کشیدہ وچ بلوچی انداز دی جھلک نظر آندی ہے بلوچ کسی ڈیزائن نوں بنا کے فیر ایس دے چارو پاسے لکیر بناندا ہے جد کہ ایس کشیدہ وچ پہلے کپڑے دے تانے بانے نال عام طور تے کالے دھاگے نال لکیر دے انداز نال مخصوص ڈیزائن بنایا جاندا ہے جس نوں ” تلیرناں ” کیہا جاندا ہے، پہلے ایس ڈیزائن نوں کچا ( کچا ٹانکا یعنی اک ٹانکا کپڑے اُتے تے دوجا کپڑے تھلے ہندا ہے ) کیتا جاندا ہے فیر ایس نوں پکا کیتا جاندا ہے، کپڑے دے تانے بانے دے نال لئے ٹانکے نوں ” توپا ” کیہا جاندا ہے تے ترچھے ٹانکے نوں ” ” کیہا جاندا ہے، پھیر ایس وچ کشمیری ٹانکے نال بھرتی ( بھریا ) پائی جاندی ہے۔ ہر ڈیزائن دا ناں وی مخصوص ہے۔ اک پٹھان گھرانہ جیہڑا اِہ شوق رکھدا ہووے اُوہ اِہ سارے ڈیزائن اک کپڑے اُتے تلیر کے کول رکھدا ہے ، ایس کپڑے نوں جس اُتے اِہ سارے ڈیزائن بنے ہون ” عالم خانہ ” کہندے ہن۔ اِہ ڈیزائن بچے دے کُرتّے جیہڑا کُڑی تے مُنڈے دُوناں واسطے ہُندا ہے، توں لے کے بستر دی چادر تک مِلدے ہن۔ اِہ کڈھائی کسی وی قسم دے کپڑے تے کیتی جا سکدی ہے۔